190ملین پاؤنڈ کیس عمران خان،بشریٰ بی بی کی سزامعطلی کی درخواستیں دائر
190 ملین پاؤنڈ کیس میں اہم پیشرفت سامنے آگئی۔ فیصلے کے دو ماہ بعد بانی پی ٹی آئی اور بشری بی بی نے سزا معطلی کی درخواستیں دائر کردیں۔ درخواستیں اسلام آباد ہائی کورٹ میں دائر کی گئیں۔
درخواست میں مؤقف اپنایا گیا ہے کہ نیب نے بدنیتی سے اپنے اختیارات کا غلط استعمال کیا۔ نامکمل تفتیش کی بنیاد پر جلد بازی میں سزا سنائی گئی۔ نیشنل کرائم ایجنسی سے معاہدے کا متن حاصل نہ کرنا تفتیشی ایجنسی کی ہچکچاہٹ کو واضح کرتا ہے۔
درخواست کے متن میں کہا گیا ہے کہ این سی اے حکام کو شامل تفتیش بھی نہیں کیا گیا۔ استغاثہ مکمل شواہد پیش کرنے میں ناکام رہی ہے۔
درخواست میں استدعا کی گئی ہے کہ 17 جنوری کو سنائی جانے والے سزا معطل کرکے ضمانت پر رہائی دی جائے۔ مرکزی اپیل کے حتمی فیصلے تک فیصلہ اور سزا معطل کئے جائیں۔
درخواست کے متن میں کہا گیا ہے کہ عدالت کو یقینی دہانی کراتے ہیں سزا معطلی کے بعد اپیل کی ہر سماعت میں موجود ہوں گے۔
بیرسٹر سلمان صفدر نے بانی پی ٹی آئی اور بشری بی بی کی جانب سے درخواستیں دائر کیں۔
